Undanfarin sumur hefur SAMAN hópurinn staðið fyrir ýmsum uppákomum þar sem minnt er á mikilvægi samveru fjölskyldunnar. Þetta árið er engin undantekning og verður annars vegar staðið fyrir skemmtidagskrá á Akureyri og hins vegar haldin skemmtileg örsögusamkeppni þar sem vegleg verðlaun eru í boði fyrir alla fjölskylduna.

Örsögu samkeppnin er fyrir unglinga á aldrinum 14-16 ára. Langar okkur að fá sendar skemmtilegar sumarleyfissögur þar sem fjölskyldan kemur við sögu, hvort sem sagan gerist úti í garði heima eða á fjarlægum slóðum. Góðar minningar verða til alls staðar!
Höfundur bestu sögunnar fær í verðlaun gistingu á KEA hóteli að eigin vali fyrir fjölskylduna og 30.000 króna bensínpening frá Orkunni. Skemmtilegustu sögurnar verða birtar á heimasíðu SAMAN hópsins, www.samanhopurinn.is

Þetta þarftu að gera:
Skrifaðu örstutta sögu um skemmtilegt sumarfrí sem þú hefur farið í með fjölskyldunni.
Lengd; ½ - 1 blaðsíða (12 punkta letur og einfalt línubil)
Sendu söguna á netfangið Þetta tölvupóstfang er varið gegn ruslpósts þjörkum, Þú verður að hafa JavaScript virkt til að sjá það. merkt „sumarleikur“ fyrir 22. júlí 2010 eða farðu inn á heimasíðu SAMAN hópsins www.samanhopurinn.is

Í sumar mun SAMAN hópurinn einnig standa fyrir skemmtilegum degi á Akureyri þann 1. júlí í samstarfi við Vinnuskóla Akureyrar. Tilefnið er að varpa hulunni af „SAMAN sólinni“ sem listakonan Jonna ásamt nemendum í vinnuskólanum hafa unnið að. Eftir skrúðgöngu þar verður Sólinni komið fyrir við hátíðlega athöfn í Gilinu. Sólinni er svo ætlað að ylja bæjarbúum um hjartarætur út sumarið og minna á ánægjulegar samverustundir fjölskyldunnar. Að athöfninni lokinni verður svo blásið til grillveislu fyrir gesti og gangandi og óvæntir gestir munu taka lagið.